RECITANDO A CELSO EMILIO FERREIRO

O día 12 do 12 de 2012 ás 12 do mediodía celebramos os 100 anos do nacemento do poeta galego Celso Emilio Ferreiro. Alumnos e alumnas dos distintos niveis recitaron un dos seus poemas, en concreto o titulado "Deitado frente ao mar" no que defende o dereito a falar galego. Porque si, porque lle peta, ...

 

Álvaro,  Iria e Érika preparándose para o recitado. 

 

 

Érika recitando e ao final, con todos saudando.

 

 

 

DEITADO FRONTE AO MAR

  

                                       Lingoa proletaria do meu pobo,                                       

eu fáloa porque sí, porque me gosta,

porque me peta e quero e dame a gaña;

porque me sai de dentro, alá do fondo

dunha tristura aceda que me abrangue

ao ver tantos patufos desleigados,

pequenos mequetrefes sin raíces

que ao pór a garabata xa nan saben

afirmarse no amor dos devanceiros,

falar a fala nai,

a fala dos abós que temos mortos,

e ser, co rostro erguido,

mariñeiros, labregos do lingoaxe,

remo i arado, proa e rella sempre.

Eu fáloa porque sí, porque me gosta

e quero estar cos meus, coa xente miña,

perto dos homes bos que sofren longo

unha historia contada noutra lingoa.

Non falo pra os soberbios,

non falo pra os ruis e poderosos,

non falo pra os finchados,

non falo pra os valeiros,

non falo pra os estúpidos,

que falo pra os que agoantan rexamente

mentiras e inxusticias de cotío;

pra os que súan e choran

un pranto cotidián de volvoretas,

de lume e vento sobre os ollos núos.

Eu non podo arredar as miñas verbas

de tódolos que sofren neste mundo.

E ti vives no mundo, terra miña,

berce da miña estirpe,

Galicia, dóce mágoa das Españas,

deitada rente ao mar, ise camiño...

 

Celso Emilio Ferreiro